Martinus Episcopus seruus seruorum Dei dilecto filio ... Abbati Monasterij Lacromensis Ragusine Diocesis salutem et Apostolicam benedictionem. Sua nobis venerabilis frater noster, frater Bonauentura Archiepiscopus Ragusinus petitione monstrauit, quod nonnulli iniquitatis filij, quos prorsus ignorat, decimas, terras possessiones, census, redditus, domos, legata, piscarias, et quedam alia bona ad Archiepiscopalem Sedem suam Ragusinam spectantia, temere et malitiose occultare, ac occulte detinere presumunt, non curantes ea dicto Archiepiscopo exhibere, in animarum suarum periculum, et ipsius Archiepiscopi non modicum detrimentum; super quo idem Archiepiscopus Apostolice Sedis remedium inplorauit. Quocirca discretioni tue per Apostolica scripta mandamus, quatenus omnes retentores occultos decimarum, possessionum, et aliorum predictorum, ex parte nostra publice in ecclesijs coram populo per te vel alium moneas, ut infra terminum competentem, quem eis prefixeris, ea dicto Archiepiscopo a se debita restituant et revelent, et de ipsis plenam ac debitam ei satisfactionem impendant. Et si id non impleuerint, infra alium terminum competentem, quem eis ad hoc peremptorie duxeris prefigendum, extunc in eos generalem excommunicationis sententiam proferas, et etiam ubi et quanto expedire videris, facias usque ad satisfactionem condignam solemniter publicari. Datum apud Urbem Veterem nonis Marcij, Pontificatus nostri anno primo.

(Farlati Illyricum Sacrum VI. köt. 116. l.)