Quod officiales teneantur incidere denarios grossos Regis Raxie et stracionare Rivoalto. Millesimo ducentesimo octuagesimo secundo, indictione X., die tercio Maii capta fuit pars: quod addatur in capitulari Camerariorum Communis et aliorum officialium, qui recipiunt peccuniam pro Communi, quod teneantur diligenter inquirere denarios Regis Rassie contrafactos nostris Venetis grossorum, si ad eorum manus pervenerint, et si pervenerint, teneantur eos incidere. Et ponatur omnes campssores et omnes illi, qui tenent stacionem in Rivoalto et eorum pueri a XII annis supra ad sacramentum, qui inquirant diligenter bona fide predictos denarios, et si pervenerint ad eorum manus, teneantur eos incidere. Et si alicui preinventi fuerint de predictis denariis a XII supra, quod illa persona, cui inventi fuerint, perdat decem pro centenario de omnibus, que eis inventi fuerint de illis denariis, et debeant incidi; et hoc stridetur publice illa die vel altera, qua captum fuerit in Maiori Consilio, quod a XV diebus in antea quilibet, cui inventi fuerint, incurrat penam predictam, et medietas pene sit invenientis, et medietas sit Communis, et deveniat in Camera Communis. Et mittantur littere de precepto per sacramentum omnibus Rectoribus preter Comitem Ragusii, et addatur in comissionibus illorum Rectorum, quod de cetero ibunt, preter dominum Comitem Ragusii, quod omnes denarios predictos, qui ad eorum manus pervenerint vel eorum officialium, teneantur incidere vel incidi facere, et quod ipsi constringant gentem suam per illos modos, quibus eis melius videbitur, quod predicti denarii non currant per suos Districtus et incidantur si invenientur; et si Consilium est contra, sit revocatum quantum in hoc.

(Ljubics, Monum. spect. hist. Slav. Merid. I. köt. 131. l.)