Andreas Dei gracia Hungarie, Dalmacie, Croacie, Rame, Seruie, Gallicie, Lodomerie, Cumanie, Bulgarieque Rex omnibus presentem paginam inspecturis salutem in Domino sempiternam. Pro meritis fidelium Corone Regie deuotorum aperire conuenit munificencie nostre sinum, ut perspicax intueatur posteritas, quid iugiter inpensa fidelitas mereatur. Proinde ad vniuersorum noticiam harum serie volumus peruenire, quod accedentes ad nostram presenciam fideles nostri Andreas Comes ac Jakou, filij Jakou, a nostra Celsitudine pecierunt, vt terram quandam Stephani, Benedicti, Wolph, Valentini, Georgij, Symonis et Donk, jobagionum Castri Vngh, Tyba vocatam, quam ab eisdem jobagionibus Castri pro trecentis marcis plenarie solutis iusto empcionis titulo compararant, prout in priuilegialibus litteris Capituli Agriensis plenius continetur, Magistro Omodeo tanquam Parochiali Comite suum per omnia prebente consensum, nostro dignaremur priuilegio confirmare. Quarum quidem litterarum Capituli Agriensis tenor talis est:

Omnibus stb. Capitulum Ecclesie Agriensis stb. (következik az egri káptalannak 1290-ki bizonyságlevele, mint fentebb 406. sz. a.)

Nos itaque eiusdem rei geste veritatem omnimodam iusticie perpendiculo satagentes perquirere examissam, nam veritas sepius exagitata magis splendescit in lucem; eorundemque Andree et Jakou Comitum fidelitatem perspectam attendentes, quibus ob insignes sudores et labores in expedicione nostra contra Albertum Ducem Austrie luculencius claruerunt, nostro nichilominus lateri tanquam consiliarij nostri fidelissimi cottidiano studio jugiter adherendo, vt nichil deesse perfeccioni et stabilitati eiusdem negocij videatur, quod adici uel aduecti pro soliditate ipsius necessario debuisset eandem possessionem Tiba nuncupatam rursus reambulari fecimus sub testimonio Capituli Agriensis, vocatis omnibus commetaneis et vicinis, et auctoritate nostra prefatis nobilibus assignare nullo contradictore penitus apparente; volentes, vt presentis scripti patrocinio titulus empcionis premisse robur optineat perpetue firmitatis, nostraque Regia prius subsequatur donacio tanquam eiusdem rei consolidacio, ex dupplici juris funiculo perpetuo valitura. Vt igitur nulla inposterum valeat cuiuslibet inpugnacionis excogitata malicia retractari, nulla serum varietas eiusdem rei seriem perturbare, memoratis nobilibus et suis heredibus heredumque suorum successoribus in perpetuam firmitatem presentes litteras concessimus duplicis sigilli nostri munimine roboratas. Datum per manus venerabilis viri Magistri Theodory Albensis Ecclesie Prepositi, aule nostre ViceCancellarij dilecti et fidelis nostri anno Domini MşCCş nonagesimo primo, indiccione quarta, septimo kalendas Septembris, Regni autem nostri anno secundo.

(Az egri káptalannak 1373. »in festo preciosissimi Corporis Christi« I. Lajos királynak 1373. »Datum in Gyosgewr die dominico proximo post Ascensionem Domini« kelt megkeresésére a »Nobilium de Nogmihal« számára kiadott átiratából; a budai királyi kamarai levéltárban.)