Conuentus Cruciferorum Domus Hospitalis Ecclesie Sancti Regis Stephani de Strigonio vniuersis presentes litteras inspecturis salutem in Domino sempiternam. Ad uniuersorum noticiam tam presencium quam futurorum harum serie uolumus peruenire, quod Comes Adrianus filius Simonis de Malus nomine suo et vice ac nomine Petri et Ladizlai filiorum suorum, ac pro Simone fratre suo, una cum Paulo filio Paska de Cheke, et Andrea filio Agustini, ac Nicolao filio Laurencij, et Sebastiano de Malus, qui pro se et pro Paulo fratre suo comparuit; et qui prenominati per nos requisiti dixerunt, se esse cognatos, commetaneos et vicinos eiusdem Comitis Adriani, ad nostram personaliter accedendo presenciam, coram ipsis, et presentibus cognatis, commetaneis et vicinis suis uolentibus, permittentibus et consensum prebentibus, quandam possessionem seu terram suam Malus vocatam empticio comparatam, cum omnibus utilitatibus et pertinencijs suis, dixit et confessus est uendidisse quinquaginta marcis plene habitis et receptis Beud filio Bene, et per eum suis posteritatibus jure perpetuo et irreuocabiliter possidendam, tenendam et habendam. Cui quidem possessioni seu terre Malus uocate a parte orientali terra prefati Sebastiani de Malus, a parte autem meridionali, occidentali et septemtrionali terra prenominati Pauli filij Paska de Malus uicinantur; sicut a partibus premissis, commetaneis et vicinis prenominatis didicimus seriatim. Insuper idem Comes Adrianus de Malus pro se, et pro Petro ac Ladizlao filij suis, et pro Simone fratre suo, firmiter et solempniter assumpsit ipsum Beud filium Bene, et suos posteros, racione predicte possessionis Malus uocate ab omnibus impetitoribus et molestare uolentibus expedire suis laboribus et expensis. In cuius rei memoriam et perpetuam firmitatem ad peticionem et instanciam parcium predictarum presentes concessimus sigilli nostri munimine roboratas. Datum anno Domini millesimo CCş nonagesimo quarto.

(Eredetie bőrhártyán, a sárga-vörös selyemzsinóron függött pecsét elveszett; a budai kir. kamarat levéltárban.)