A B C
Frater Nicolaus Magister Domus Hospitalis et Conuentus Cruciferorum Ecclesie Sancti Regis Stephani de Strigonio vniuersis presentes litteras inspecturis salutem in filio Virginis Gloriose. Quum ea que temporaliter aguntur ne cum tempore dilabantur solent et debent scripti patrocinio communiri: hinc est, quod ad uniuersorum noticiam tam presencium quam futurorum harum serie volumus peruenire, quod Georgius filius Andree de Zomur, et domina Marguich relicta Damyani Comitis vna cum Dominico filio suo, domina Kune relicta Endree, domina Chuda relicta Cozme de eadem Zomur, domina Martina relicta Mathey; Blasius, Lampertus et Antonius filij Berke; Salomon, Johannes et Petrus, fratres ipsorum; Jacobus filius Nicolai, Stephanus filius Pouse de eadem Zomur; Endree gener prefati Cozme; et Dyonisius, Mychael gener prefati Mathey, et Petrus frater Yburharth gener eiusdem Mathey; vna cum commetaneis et vicinis ipsorum, videlicet nominatim Pouka filio Petri de Wrsaap, Dominico et Johanne filijs Gregorij de eadem Wrsaap, qui pro se et pro Gregorio fratre ipsorum, Nicolao, Petro et Yoob filijs Antol de eadem Wrsaap, Petro filio Thome de Berche, Laurencio, Dominico et Walentino filijs Benedicti, et Andrea filio Michaelis de Wrsee, Luka genero Nicolai filij Petri de Boyna, Comite Benedicto et Nicolao filijs Andree Comitis de Boztuh, qui pro se et pro Johanne ac Beke et Wanch fratribus suis comparuerunt, Salomone filio Samul, Petro filio Andree de Boyna, Benchench et Stephano filijs Benchench, Tordos filio Paulban, Nicolao et Tompus filijs Martini de Morouch; qui vicini et commetaney personaliter comparendo permiserunt ex communi consilio et voluntate, consensum prebendo et assensum, dilerunt et confessi sunt quandam possessionem seu terram ipsorum Oduornok uocatam, iam dudum vacuam et habitatoribus destitutam, et murum ac lapides de ecclesia eiusdem possessionis propter desolacionem et antiquitatem dicebant esse dissolutos et confractos, cum suis vtilitatibus et pertinencijs, videlicet feneto, nemore, virgultis, arbustis et alijs vtilitatibus, a wenerabili Capitulo Strigoniensi in concambio factam et datam, cum medietate seu parte terre, que medietas siue pars a Corrardo filio Chemeya eis fuit deuoluta, et per eosdem empticio comparata, vendidisse et assignasse sexaginta marcis coram nobis plene habitis et receptis Magistro Zuard nepoti Wech, et per eum suis posteritatibus iure perpetuo et irreuocabiliter possidendam, tenendam et habendam. Cui quidem possessioni Oduornok uocate a parte orientali terre Nyek et Berche uocate, a parte uero meridionali terra Wrsee nuncupata, a parte autem occidentali terra Boyna, et a parte septemtrionali terra Saap prenominate certis metis et terminis distincte et separate vicinantur. Insuper prefati Georgius, domina Marguich, Dominicus filius eiusdem, domina Kune, domina Chuda, Martina, Blasius, Lampertus et Antonius filij Berke, Salomon, Johannes et Petrus fratres ipsorum, Jacobus, Stephanus, Endree, Dyonisius, Mychael et Petrus frater Yburharth, tam pro se quam per suos (igy) firmiter et solempniter assumpserunt ipsum Magistrum Zuard et posteros in perpetua possessione predicte terre Oduornok uocate, et medetatis seu partis predicte terre conseruare et ab omnibus impetitoribus et molestare uolentibus expedire suis laboribus et expensis. In cuius rei memoriam et perpetuam firmitatem ad peticionem et instanciam parcium predictarum presentes concessimus sigilli nostri munimine roboratas. Datum anno Domini millesimo ducentesimo nonagesimo quinto, XV. kalendas Decembris.
(Eredetie bőrhártyán, zöld-sárga selyemzsinóron függő pecsét alatt; a budai kir. kamarai levéltárban.)