Alexander episcopus seruus seruorum dei. Carissime in Christo filie Regine Vngarie Illustri Salutem et apostolicam benediccionem. Professarum mulierum uasis fragilibus nunquam potest salubrius consuli, ut ad usum retinendi normam regularis obseruancie solida perseuerent, quam ut probate religionis uirorum custodie committantur, quorum uirtute ipsarum imbecillitas fulciatur. Cum igitur tamquam Deo deuota et religionis amatrix in municipio, quod in Insula Danuby, que Insula leporum dicitur Vesprimiensis diocesis Carissimus in Christo filius noster Vngarie Rex illustris uir tuus de nouo construxit, ubi multa milia hominum congregari dicuntur, quoddam Monasterium sanctimonialium sub fratrum predicatorum ordinis degencium institutis de bonis regalibus fundaris ac dotaueris copiose, in quo ipsius Regis et tua filia et plures alie uirgines genere nobiles professionis habitum susceperunt perpetuo inibi domino seruiture, cupiasque ibidem fratrum ordinis eiusdem habere Conuentum parata, ut asseris pro fabricandis ecclesia ac domibus ad opus ipsorum fratrum sumptus necessarios ministrare nos tuo pio desiderio uolentes satisfacere in hac parte dilecto filio priori prouinciali predicatorum fratrum in Vngaria nostris damus litteris in mandatis,* ut Conuentum ipsi loco taliter construendo auctoritate nostra grata liberalitate concedat, qui predictis sororibus diuina celebrent, ipsarum confessiones audiant, eisque ministrent ecclesiastica sacramenta constitucione ipsius ordinis contraria uel priuilegio seu indulgencia sedis apostolice nequaquam obstantibus (per) que id ualeat inpediri. Ita tamen, quod locus mansionis fratrum et monasterium sororum competentis distancie spacio distinguantur. Datum Anagnie V. Idus Octobris. Pontificatus nostri Anno Quinto.

Sárga-vörös selyemszálakon függő ólom pecséttel. Eredetije az orsz. ltár kincst. oszt. Mon. Pos. 68. 2. Közli: Vincze Gábor.