(B)ela dei gracia Hungarie, Dalmacie, Croacie, Rame, Seruie, Gallicie, Lodomerie, Cumanieque Rex Omnibus Christi fidelibus presens scriptum inspecturis Salutem in omnium saluatore. Ad vniuersorum noticiam harum serie uolumus peruenire, quod cum populi Monastery nostri de Turuch, in Sala et uillis ad eandem pertinentibus conmorantes maximam in terra precipue pascuali necessitatem et penuriam paterentur, adeo eciam, quod in terris ipsius monastery commode residere non possent, nos utilitati predicti Monastery nostri de Turuch, cuius sumus fundator et patronus specialis prouidere uolentes et necessitatibus populorum ipsius benignitate regia consulere cupientes, pro obtinendo eterne salutis remedio, terram quandam populorum nostrorum retiferorum, qui uulgo halous nuncupantur, Vduorth uocatam contiguam et uicinam terris predicti Monastery Beka et Vduorth nuncupatis cum omnibus vtilitatibus suis et pertinencys sub antiquis metis et terminis contulimus, dedimus et donauimus predicto Monasterio nostro de Turuch in perpetuam elemosinam inreuocabiliter possidendam. Annectentes ipsam terram Wduorth terris sepedicti Monastery nostri Sala, Beka et Wduorth uocatis ad utilitatem ibi residencium populorum. Item concessimus eidem Monasterio nostro de Turuch locum pro parando et habendo ponte super fluuio Wag, inter terram dicti Monastery ex una parte, et terram retiferorum nostrorum de Turmoch ex altera parte fluuy Wag supradicti, cum locus, in quo prius populi prefati Monastery pontem habebant, sit per Bartolomeum et Vrbanum nobiles de Wecche occupatus. (V)t igitur huius nostre donacionis seu elemosine series firma semper et inconcussa permaneat, nec per quempiam ullo unquam ualeat retractari (így), presentes eidem monasterio concessimus litteras dupplicis sigilli nostri munimine roboratas. Datum per manus magistri Farcasy prepositi Albensis, Aule nostre vicecancellary, dilecti et fidelis nostri. Anno domini. M° CC° Sexagesimo septimo. Regni autem nostri Anno Tricesimo secundo.

Kettős függő pecsét töredékeivel. Eredetije az orsz. ltár kincst. oszt. Jes. Tyrn. 24. 49. Közli: Vincze Gábor.