Ladizlaus Dei gracia Hungarie, Dalmacie, Croacie, Rame, Seruie, Gallicie, Lodomerie, Cumanie, Bulgarieque Rex omnibus Christi fidelibus presentes litteras inspecturis salutem in omnium saluatore. Quod regum liberalitas circumspecta suorum statui inuigilet subiectorum libre succombit equitatis, et est consentaneum racioni; nam sic fidelibus fides adaugetur, et si qui a tramite fidei exorbitarent, resipiscunt et eiusdem cultu fidei sagaciter induuntur, nam ex fidelium amplitudine reges regnant, si inueniantur in ardore fidei prompciores. Considerantes itaque premissa et singula premissorum, vniuersitatis omnium noticie futurorum scilicet et presencium harum serie volumus peruenire, quod nos consideratis meritis et gratuitis obsequiis Laurency comitis Supruniensis et de Vrbaz, dilecti et fidelis nostri et eiusdem grata et laudabilia seruicia, que a primeuis puericie sue temporibus domino B. Regi, auo nostro, et postmodum domino Stephano felicis recordacionis patri nostro, karissimis, quondam serenissimis Regibus Vngarie, nostris predecessoribus, et corone Regie, ac nobis deuote, fideliter et omni segnicie procul pulsa, et multimodis sagacitatibus accersitis indesinenter impendere non cessauit, nostre maiestatis oculis recolligere et enumerare quamuis non possemus, cupientes adeo, quod in plerisque casibus et si perquam duris in Regni nostri expedicionibus, periculosis ruinis, letalibus incomodis et diuersis se exponere non uerendo, nec parcendo persone sue, uel suorum, cominus eas propter fidelitatis ardorem, que eidem comiti Laurencio et tocius sui generis propagini, qua naturaliter antiquitus inserta esset, omnimodis diuersarum inmergerent voluntatibus fortunarum ita, quod non ipse pro nobis sue persone misericorditer pepercerit in huiusmodi letalibus casibus, sed fortuna; cuius comitis diuersarum virtutum species celeberrima laude dignissimas annectere presentibus stilus nequit, quibus omnibus, si non equa lance, ut promerebatur, aliqualiter tamen, meritis eiusdem et gratuitis famulatibus, quos singillatim exprimere presentibus non valemus, cum in aliis priuilegiis ipsi comiti Laurencio, a sacris progenitoribus nostris indultis annectuntur, quamquam in amplioribus et magnis arduis donatiuis, ipsi comiti Laurencio pro talibus meritis competentibus prouidere nobis animo sit, pro modico, minimo, et exinanito reputantes respectu suorum seruiciorum quod agimus ad presens, eius tamen actibus fide plenis ad presens, quantum facultas et posse nos permisit respondere cupientes, possessionem quandam in Comitatu Posoniensi existentem Wywar vocatam, quam primo pater eiusdem comitis Laurency, comes Kemen de donacione, collacione et tradicione Andree quondam magnifici Regis Vngarie predecessoris nostri habuit, tenuit et possedit, et postmodum alienata ab eodem aliqualiter, Castro Posoniensi fuerat applicata, cum omnibus suis utilitatibus, villis scilicet, vineis, siluis, pratis, fenetis, nemoribus, aquis, terris arabilibus et pertinencys quibuscunque, de consensu domine Elysabeth Regine Vngarie serenissime, matris nostre karissime, et de voluntate et permissione omnium baronum et magnatum Regni nostri reddidimus et reddimus, contulimus et conferimus, donauimus et donamus memorato comiti Laurencio, et per eum suis heredibus, heredumque successoribus iure perpetuo irreuocabiliter possidendam, alienatam ab ipso Castro Posoniensi exemptam, sicut antea fuerat et eciam segregatam habeat, teneat et possideat idem Laurencius comes et sui successores eo iure et ea plenitudine gracie Regalis, prout predictus pater suus comes Kemen dinoscitur possedisse. Preterea statuentes sanccimus et statuimus sanccientes, quod idem comes Laurencius et sui successores de ista donacione, collacione, reddicione, et restitucione eis per nos factis, veri domini et possessores dicte possessionis et utilitatum ac pertinenciarum eiusdem predictarum ex nunc effecti semper sine molescia gaudeant dicte possessionis iuribus vniuersis; hoc expressim annotato, quod omnia instrumenta et priuilegia, seu quelibet munimenta, que super donacione, collacione, translacione et tradicione dicte possessionis et pertinenciarum eiusdem, cuique uel quibuscunque de incolis Regni nostri quocunque ingenio, modo uel ordine emanassent, uel forte quod non credimus per quempiam emanare contingerent, cassa et irrita penitus habeantur, et sicubi in lucem producta fuerint, viribus careant et uitentur, soli presencium tenori litterarum circa presentem donacionem, collacionem et tradicionem nostram ipsi comiti Laurencio et suis successoribus per nos factis (így) vigorem, robur perpetuum et sempiternam firmitatem reseruantes. Ceterum concessimus et concedimus, quod idem comes Laurencius et sui successores per istam donacionem nostram auctoritatem, ius et posse habeant donandi, legandi, tradendi cuicumque vel quibuscunque voluerint, et a se alienandi dictam possessionem uel quocunque titulo, uel ordine distrahendi inter uiuos et in morte, et liberam teneant et absolutam facultatem pro sue libito voluntatis; maxime cum predictam possessionem et pertinencias ipsius supradictas vna cum tributo ibidem habito, quod Tribitum (így) similiter ipsi comiti Laurencio et suis successoribus reddendum et restituendum fore censuimus Regio cum fauore, memoratus comes Kemen tempore predicti Andree Regis et ipsius B. regis, quoad uixit, pacifice tenuerit et quiete. In cuius rei certitudinem presentes contulimus dupplicis sigilli nostri munimine roboratas. Datum per manus magistri Benedicti, Orodiensis Ecclesie prepositi, aule nostre vicecancellary, dilecti et fidelis nostri. Anno domini M° CC° LXXIII° III° Kalendas Aprilis. Regni autem nostri anno primo. Magistro Nicolao sancte Strigoniensis Ecclesie Electo et perpetuo comite loci eiusdem, aule nostre Cancellario et venerabilibus patribus Stephano Colocensi et Johanne Spalatensi archiepiscopis, Lamperto Agriensi, Job Quinqueecclesiensi comite Musuniensi, Philippo Waciensi, aule domine Regine, matris nostre karissime Cancellario et comite Naugradiensi, Paulo Wesprimiensi, Briccio Chanadiensi, Timotheo Zagrabiensi, Lodomerio Waradiensi, Dionisio Jauriensi et alys Episcopis, ecclesias Dei feliciter gubernantibus. Rolando Palatino, bano de Macho et Judice cumanorum Matheo bano tocius Sclauonie, Nicolao Woiawoda trausiluano et comite de Zonuk, Iwachino magistro tauarnicorum nostrorum, comite de Plis, Ladizlao iudice curie nostre et comite de Barana et de Zibinio, Laurencio comite Supruniensi et de Vrbaz, Herrico bano de So et de Wazara, Stephano bano de Bozna, Gregorio bano de Boronch et de Kucho, Paulo bano de Zeurino, Reinoldo magistro Dapiferorum nostrorum, comite Zalagageuriensi, Laurencio magistro Pincernarum nostrorum, comite de Kewe et de Kraso, Vgrino magistro Agasonum nostrorum, comite Sirmiensi, Emerico comite Simigiensi, Omodeo comite castri ferrei, Johanne comite Zaladiensi, Salomone comite Albensi, Michaele comite Nitriensi et alys quam pluribus comitatus Regni tenentibus et honores.

Vörös-zöld színű selyemszálakon függő kettős pecsét töredékével. Eredetije az orsz. ltár kincst. oszt. Jes. Tyrn. 13. 5. Rövid kivonatát adja Fejér, id. m. V. 2. 86. l. Közli: Vincze Gábor.