Ladizlaus dei gracia Hungarie, Dalmacie, Croacie, Rame, Seruie, Gallicie, Lodomerie, Comanie, Bulgarieque Rex Omnibus Christi fidelibus presentes litteras inspecturis Salutem in omnium saluatore. Ampliatur regimen, munitur gubernaculum solidatur solium, dum bellatorum numerus ex superadditis continuis crescit incrementis. Proinde ad vniuersorum noticiam tenore presencium uolumus peruenire, quod Endure, Nicolaus dictus Ormous, Andreas, Michael et Nicolaus paruus fily eiusdem, Petrus et Farcasius fily Andree, Mixe et Johannes filius eiusdem, Lampertus filius Budrug de villa Owgia, Bank filius Georgy de Wata, Johannes filius Chekud de Magari ex iobagionibus Castri nostri Posoniensis trahentes originem ad nostram accedentes presenciam de nostra maiestate Regia humiliter suplicando postularunt, ut ipsos ob merita seruiciorum suorum nobis et Regno nostro inpensorum a iobagionatu Castri nostri Posoniensis eximere, et in cetum ac collegium Regalium seruiencium nostrorum transferre dignaremur. Nos itaque, quem Regia benignitas incitat et inducit seruicia quorumlibet fidele (így) famulancium intueri, et pro meritis respondere singulorum, consideratis seruicys Endure, filiorum et cognatorum suorum memoratorum, que in omnibus et diuersis expedicionibus Regni nostri videlicet tam bellis intrinsecis, quam extrinsecys corone Regie incommutabiliter adherendo se diuersis fortune casibus submittendo inpenderunt indefesse, que propter sui multitudinem longum esset enarrare, specialiter tamen consideratis seruicys eorumdem, que in exercitu nostro, quem contra Regem Bohemorum, inimicum et persecutorem nostrum habebamus, in quo, deo propicio, eodem Rege Bohemorum interempto felicem uictoriam sumus consecuti, cum sumpma fidelitate strennue bellando pro statu prospero nostri regiminis et Corone studuerunt exercere, et coram oculis nostre maiestatis conplacere, ipsos Endure, Nicolaum et Michaelem et Nicolaum paruum filios eiusdem, Petrum, Farcasium, Myxe, Johannem et Lampertum de villa Owgia, Bank filium Georgi et Johannem filium Chekud memoratos a iobagionatu Castri Posoniensis et per eos eorumdem heredes, heredumque suorum successores cum terris suis quouis titulo ipsos contingentibus a iurisdiccione et potenciam (így) Comitis Posoniensis pro tempore constituti duximus eximendos, et in numerum, cetum ac collegium seruiencium nostrorum transferendos tam pure et simpliciter, ut eadem gaudeant et letentur libertate, qua ceteri nobiles Regni nostri perfruuntur. In cuius rei memoriam perpetuamque firmitatem presentes concessimus litteras duplicis sigilli nostri munimine roboratas. Datum per manus discreti viri magistri Anchonis aule nostre vicecancellary, dilecti et fidelie nostri. Anno Domini M° CC° octuagesimo primo, tercio Kalendas Septembris. Indiccione octaua. Regni autem nostri anno nono.

Az esztergomi káptalannak 1347. évi átiratából,** melynek hártyára írott, függő pecsétes eredetije megvan az orsz. ltár kincst. oszt. Mon. Pos. 50. 7. Közli: Vincze Gábor.