Ladizlaus dei gracia Ungarie, Dalmacie, Croacie, Rame, Servie, Gallicie, Lodomerie, Cumanie, Bulgarieque rex. Omnibus christi fidelibus, presentem paginam inspecturis salutem in salutis largitore. Ad universorum noticiam harum serie volumus pervenire, quod Inuk, Tubul, Elyas, Bolya et Petrus, custodes siluarum nostrarum de Asguth, ad nostram accedentes presenciam, a nobis humiliter supplicando postularunt, ut ipsos a seruicio custodie siluarum nostrarum eximere, et in cetum, numerum, ac collegium, regni nostri nobilium simul cum dimidietate terre ipsorum, Asguth vocate, de benignitate regia transferre dignaremur. Nos itaque considerantes fidelitatis et seruiciorum merita dictorum Inok, Elye, Tubul, Bolya et Petri, que iidem in diuersis expedicionibus regni nostri, et specialiter in expedicione nostra, quam in Houd contra Cumanos habuimus, fideliter impenderunt et indefesse, in ibi letalia volnera subportantes, eosdem Inok, Elyam, Tubul, Bolya, et Petrum, custodes siluarum nostrarum de Asguth, simul cum dimidietate terre Asguth vocate, ab omni honere seruitutis custodie siluarum nostrarum eximendo, et in numerum, cetum, et collegium regni nostri nobilium seruiencium duximus agregandos, ita ut de cetero predicti Inok, Elyas, Tubul, Bolya et Petrus ac eorum heredes heredumque suorum successores, illa eademque gaudeant et fruantur libertate, qua ceteri regni nostri nobiles servientes gratulantur, sub vexillo regio militantes. In cuius rei memoriam, perpetuamque firmitatem, presentes concessimus litteras, dupplicis sigilli nostri munimine roboratas. Datum per manus discreti viri magistri Bartholomei prepositi de Scepus aule nostre vicecancellary dilecti et fidelis nostri. Anno domini m°. cc°. lxxx°. tercio, undecimo calendas octobris, indiccione undecima. regni autem nostri anno duodecimo.

Eredetije az Asgúthy cs. iratai közt, Tomka Mór úrnál, Kassán. Közli: Csontosi János.