Bonifacius episcopus seruus seruorum dei. Dilectis filys Preposito et Conuentui Monastery sancte Marie de Turuch per Prepositum soliti gubernari Premonstratensis ordinis Strigoniensis diocesis Salutem et apostolicam benediccionem. Cum a nobis petitur, quod iustum est et honestum, tam vigor equitatis, quam ordo exigit racionis, ut id per sollicitudinem oficy nostri ad debitum perducatur effectum. Sane peticio uestra nobis exhibita continebat, quod inclite memorie Bela Vngarie Rex de propria salute cogitans, ac cupiens terrena in celestia et transitoria in eterna salubri conmercio commutare, de Sala, de Beke, de Vduorh, de Purud, de Palatha, de Cumboi, de Worodruik, de Wztroyka et de Chumboi, et quasdam alias villas cum omnibus vtilitatibus et pertinencys suis, necnon tributum portus et Pontis de Sala, et quedam alia tributa tam in terris, quam in aquis, ac terras, vineas, iura, iurisdicciones, possessiones et nonnulla alia bona in Strigoniensi diocesi consistencia, et tunc ad ipsum Regem spectancia pro sue ac progenitorum suorum remedio animarum vobis et Monasterio uestro donauit et contulit intuitu pietatis, prout in patentibus litteris inde confectis bulla aurea ipsius Regis munitis plenius dicitur contineri. Nos itaque uestris supplicacionibus inclinati, quod super hoc ab eodem Rege pie ac prouide factum est ratum et gratum habentes, id auctoritate apostolica confirmamus et presentis scripti patrocinio communimus. Nulli ergo omnino hominum liceat hanc paginam nostre confirmacionis infringere uel ei ausu temerario contraire. Si quis autem hoc attemptare presumpserit, indignacionem omnipotentis dei et beatorum Petri et Pauli apostolorum eius se nouerit incursurum. Datum (Rome) apud Sanctum Petrum X. Kalendas Aprilis Pontificatus nostri Anno Tercio.

Függő pecsét nyomaival. Eredetije az orsz. ltár kincst. oszt. Jes. Tyrn. 19. 4. Közli: Vincze Gábor.