Capitulum Ecclesie Transsiluane Omnibus xpi fidelibus presentem paginam inspecturis Salutem in omnium saluatore. Ad Vniuersorum noticiam, tam presencium quam futurorum harum serie volumus peruenire. Quod constitutis personaliter coram nobis Ladizlao, Bench, Johanne, Paulo, filys Johannis nobilis de Chamafaia, de Comitatu de Doboka, ex vna parte, et Nicolao dicto Wos maiori filio Emich, Jacobo filio Chama, et Nicolao filio Johannis fily predicti Emich, pro se et fratribus suis absentibus ex altera, idem Ladizlaus, Bench, Johannes et Paulus, fily prefati Johannis nobilis de Chamafaia, confessi sunt oraculo viue uocis, porcionem ipsorum, quam habent in villa seu possessione Wazunteluk nominata, in qua Ecclesia ad honorem beati Egidy est fundata, in Comitatu de Doboka, eis iure hereditario deuolutam, predicto Nicolao dicto Wos maiori filio Emich, Jacobo filio Chama, Nicolao filio Johannis fily predicti Emich cum omnibus vtilitatibus et pertinencys suis, pro quindecim marcis argenti terrestris ponderis, plene habitis vt dixerunt, dedisse, vendidisse, tradidisse et statuisse, et coram nobis dederunt, vendiderunt et tradiderunt perpetuo et irreuocabiliter tenendam, possidendam, pacifice et habendam, ipsis et suorum heredibus heredumque suorum successoribus. Obligantes se insuper prenotati Ladizlaus, Bench, Johannes et Paulus fily Johannis nobilis de Chamafaia, quod ab omnibus, processu temporom Nicolaum filium Emich, Jacobum filium Chama, Nicolaum filium Johannis, aut heredes ipsorum uel heredum eorundem successores, super predicta porcione inpedire uel inquietare volentibus, expedire proprys laboribus et expensis. In cuius rei testimonium et robur perpetuum, ad instancias et preces ambarum parcium, presentes dedimus litteras nostri sigilli munimine Roboratas. Datum feria sexta proxima ante festum Pentecostes. Anno domini M°. C°C°C°. Tricesimo Primo. Dominico preposito, Sanco Cantore, Thoma Custode, Adriano Decano Ecclesie nostre existentibus.

Hártyán, vörös-zöld selyem zsinóron függő pecséttel; eredetije a gr. Wass cs. czegei ltárában, Lit. A. fasc. 1. nr. 16. Közli: Fehérpataky László.