Lodouicus dei gracia Rex Hungarie Polonie Dalmacie etc. fideli suo magnifico viro Comiti Jacobo de Scepus Judici Curie sue Salutem et graciam. Quia ex literali insinuacione venerabilis in xpo patris domini Michaelis Episcopi ecclesie Agiensis percepimus, vt Emericus sacerdos filius Ladizlai de Lezna super dote et rebus paraffernalibus domine auie sue et quarta puellari domine matris sue a Kolyn et Jacobo filys Johannis da Vsfalua, Bartholomeo et Johanne filys Gregory de Tamasfolua, sentenciam, Juridice coram ipso procedendo reoptinuisset, ydemque sentenciam excommunicacionis et interdicti, quam contra ipsos Jugiter promulgasset, non curando, nullam ipsi Emerico sacerdoti satisfaccionem de premissis exhibere curassent, Ideo volumus et fidelitatem vestram requirimus, quatenus dictos nobiles ad vestri presenciam legitime euocari facientes, ex parte eorum in congregacione generali proxime in Comitatu Abawyuariensi celebranda, super facto dotis et rerum paraffernalium predictarum, habita examinacione sentencie per ipsum dominum Episcopum late, eidem Emerico sacerdoti merum et condignum exhibeatis iusticie complementum, et si factum quarte puellaris premissum ipsius domini Episcopi Judicio pertinere agnoueritis, tunc eciam facta examinacione premisse sentencie, eidem Emerico sacerdoti iusticiam obseruetis ex parte eorumdem. In casu vero vbi dicta quarta puellaris nostro et Judicum nostrorum pertinet examini, in hac parte consuetudinem regni nostri obseruetis. Datum in Castro nostro dyosgeur in festo beati Staniazai martiris, Anno domini M° ccc° lxx° sexto.

Papíron, a szöveg alatt vörös viaszba nyomott gyűrű-pecsét maradványaival; eredetije Lapispatakon, a Keczer cs. ltárában. Közli: Nagy Gyula.