Maria dei gracia Regina Hungarie, Dalmacie, Croacie etc. fideli suo magistro Frank Comiti nostro de Sarus uel uicecomiti eiusdem comitatu in eodem constituto, Salutem et graciam, dicit nobis Johannes filius petri de Salgow graui sub querela, quod Johannes filius Johannis de Sebus pridem uidelicet tempore occupacionis Jurium possessionariorum petri dicti Zudar dictam possessionem suam Salgow nomine nostro regio occupasset, ipsum de pacifico dominio eiusdem indebite excludendo, asserendo ipsam possessionem Salgow dicti petri Zudar prefuisse et ea racione ad manus nostras regias fore deuolutam. Cum tamen idem Johannes filius petri a pluribus retroactis temporibus in dominio dicte possessionis Salgow absque alicuius contradiccionis obice pacifice perstetisset et perstare deberet de presenti. Insuper eciam universa bona et res eiusdem Johannis fily petri tunc inibi reperta aufferi fecisset ab eodem, super quo fidelitati vestre firmiter precipiendo mandamus, quatenus scita prius premissorum, mera veritate si sic inueneritis ut nostre predicitur maiestati, extunc prefatum Johannem filium petri iterum in dominium dicte possessionis Salgow restatuere et in eadem contra quoslibet illegitimos inpetitores protegere et defensare debeatis, premissa eciam ablata eidem per prefatum Johannem filium Johannis restitui facientes ex integro. Et aliud pro nostra gracia non facturi. Datum in Gyosgewr sabbato proximo post octavas corporis Xpi anno eiusdem M° ccc° octuagesimo tercio.

Papíron, hátán nagy kerek pecsét nyomaival; eredetije Lapispatakon, a Keczer cs. ltárában. Közli: Kiss Béla.