Nos Sigismundus dei gracia Rex Hungarie Dalmacie Croacie etc. Marchioque Brandenburgensis etc. Sacri Romani Impery vicarius generalis et regni Bohemie gubernator, memorie commendamus per presentes, quod cum nos possessionem Posalaka apellatam in Comitatu de Sarus existentem, quam fideles nostri magister Martinus maioris cancellarie nostre notarius ac Paulus frater eiusdem vterinus ipsorum ac cetororum fratrum suorum de Wzfalwa fore asserunt, populosam facere et multitudine populorum intendamus decorare, volumus igitur, vt quicunque libere condicionis homines ad dictam possessionem Posalaka causa commorandi venire voluerint, libere veniant et secure commorentur a die aduentus ipsorum trium annorum libertate pacifice et quiete fruituri in eadem sub nostra proteccione et tutela speciali. Quocirca vobis fidelibus nostris vniuersis et singulis nobilibus et alys possessionatis hominibus presencium noticiam habituris firmissimo regio damus sub edicto, omnino volentes, quatenus Jobagiones vestros, qui de vestris tenutis possessionibus et honeribus habita licencia et iustis terragys depositis alysque debitis persolutis ad predictam possessionem ipsorum Posalaka vocatam causa commorandi venire voluerint, libere pacifice et absque omni impedimento et calumpnia abire permittatis, saluis eorum rebus et personis. Qui si feceritis benequidem, alioquin commisimus et serie presencium firmiter committimus fidelibus nostris Comiti vel vicecomiti et Judicibus nobilium illorum Comitatuum, in quibus tales reperti fuerint qui huiusmodi mandatis nostris et consuetudinarie legi regni nostri parere non curauerint, vt ipsi eosdem cum ipsorum dampnis et grauaminibus consuetis ad faciendum premissa compellant et astringant auctoritate nostra presentibus eis in hac parte attributa mediante, Juris ordine obseruato. Et hoc volumus in foris et alys locis publicis palam facere proclamari. Datum Bude sabbato proximo ante dominicam Reminisscere, Anno domini Millesimo quadringentesimo decimo.

A szöveg alá vörös viaszba nyomott pecsét maradványaival; eredetije Lapispatakon, a Keczer cs. ltárában. Közli: Nagy Gyula.