commissio propria domini Regis.

Nos Sigismundus dei gracia Romanorum Rex semper augustus, ac hungarie Bohemie Dalmacie Croacie etc. Rex, Memorie commendantes tenore presencium significamus quibus expedit vniuersis, Quod nos consideratis et in nostri memoriam reductis fidelitatibus et fidelium seruiciorum meritis Nobilis viri Sigismundi fily francisci de Chychyr familiaris Reuerendi in Xp° patris domini Georgy archiepiscopi Strigoniensis et Magnificorum Comitis Mathius de palouch Judicis curie nostre ac Emerici fratris eorundem fidelium nostrorum dilectorum, quibus Idem a plurimorum annorum et temporum iam transactis curriculis in diuersis nostris et regni nostri agendis et expedicionibus validis, sicuti prosperis sic et aduersis, personam suam varys et formidabilibus fortune casibus exponendo, cum sumpme fidelitatis constancia et solicitudine indefessa maiestati nostre gratum se reddere studuit et acceptum, volentes eidem Sigismundo pro huiusmodi suis fidelibus seruicys nostro regio occurrere cum fauore, ad humilime Supplicacionis instanciam ipsius Sigismundi per ipsum nobis propterea porrectam, eidem Sigismundo ac annotato francisco patri, necnon Mathie carnali, Item Jacobo et Thome filys Johannis dicti Oroz, dominico Job et paulo filys pauli dicti Ormoos, Georgio petro Johanni et dauid filys Stephani similiter Ormoos dicti de prefata Chychyr, patruelibus et condiuisionalibus fratribus eiusdem de mera nostre potestatis plenitudine et gracia speciali duximus annuendum et concedimus presencium per vigorem, vt ydem Sigismundus necnon pater et fratres sui predicti in facie possessionum ipsorum Chychyr predicte necnon vayan vocatarum, ipsos vt dicitur Justo titulo conceniencium, ac terrarum intra metas earundem possessionum adia(cencium), in loco vbi eis magis congruum videbitur, Castrum seu fortalicium de lignis aut lapidibus construendi edificandi preparandi ac eleuandi liberam tutam et omnimodam habeat (így) potestatis facultatem, harum nostrarum vigore et testimonio litterarum mediante. Datum Strigony, Sabbato proximo ante festum beate Marie magdalene, Anno domini Millesimo quadringentesimo vigesimo quinto, Regnorum nostrorum Anno Hungarie etc. xxx^mo Nono, Romanorum quintodecimo et Bohemie quinto.

Hártyán, a szöveg alá papírszelettel borított vörös viaszba nyomott kerek pecséttel; eredetije a Csicsery cs. ltárában. Közli: Nagy Gyula.