Sigismundus dei gracia Romanorum Rex semper Augustus ac Hungarie, Bohemie, Dalmacie, Croacie etc. Rex, fidelibus nostris Comiti vel vicecomiti et Judicibus Nobilium Comitatus de Saros presentibus et futuris, Item magnifico Petro filio Herrici de Berzeuicze magistro tanarnicorum nostrorum et Egregio Stephano Poharnok de eadem, Salutem et graciam. Cum nos fideles nostros Johannem filium Nicolai de Machola, ac Ladislaum Paulum et Nicolaum filios eiusdem, necnon alterum Nicolaum filium Pauli de Wzfalua, simulcum uniuersis possessionibus porcionibus et iuribus possessionariis rebusque et bonis eorum quibusuis iustis utputa et legitimis in nostram Regiam receperimus proteccionem et tutelam specialem, viceque nostre maiestatis persone vestre commiserimus tuicioni, Igitur fidelitati vestre firmiter precipiendo mandamus, quatenus amodo et deinceps prefatos Johannem filium Nicolai ac Ladislaum Paulum et Nicolaum filios eiusdem necnon alterum Nicolaum filium Pauli in pretactis possessionibus porcionibus et Juribus possessionariis rebusque et bonis eorum vniuersis Justis ut prefertur et legitimis contra quoslibet illegitimos impetitores ac sine lege et Juris tramitate (így) ipsos inquietare volentes tueri protegere defensare ac indempniter manutenere debeatis. Nostre Maiestatis in persona et auctoritate presentibus vobis in hac parte attributa et Justicia mediante. Secus non facturi, presentes eciam perlectas reddi iubemus presentanti. Datum Cassouie in dominica Reminiscere Anno domini MCCCCXXIX° Regnorum nostrorum anno Hungarie etc. XLII, Romanorum XIX°, et Bohemie nono.

Papíron, a szöveg alá vörös viaszba nyomott pecsét maradványaival; eredetije Lapispatakon, a Keczer cs. ltárában. Közli: Boynychich Iván.