Nos Ladislaus Apor de Althorya ad vniuersorum noticiam memorie commendamus per presentes, Quomodo nos quibusdam nostris necessitatibus nos ad presens sumpme vrgentibus euitandis quendam (így) nostram hereditatem siculicalem domokos mathe Jakab vocitatam et ab eodem Jacobo domokos mathe presente filio suo Valentino et patri suo in nullo contradicente precio perpetuo emptam, in villa sew possessione Belaffalwa in sede Kyzdi parte ab orientali inter hereditates agilium pauli Mathe parte vero occidentali petri Bechyek habitam et existentem, simulcum sessione et vniuersis terris arabilibus, fenetis, siluis, necnon alys ad eandem hereditatem siculicalem pertinencys iam ad nos de Jure spectantibus et de Jure pertinere debentibus, ex consensu et voluntate filiorum puerorum omniumque fratrum et consanguineorum nostrorum et nullo nobis contradicente, agili Georgio Weres de pulyan ac eius heredibus et successoribus in filios filiorum pro viginti quinque florenis hungaricalibus in puris asperis et bonis ab eodem plene et integraliter levatis et habitis, precio perpetuo, perpetue et irreuocabiliter possidendam tenendam pariter et habendam dedimus donauimus et contulimus, immo donamus damus et contulimus (így). Assumpmimusque nichilominus annotatum Georgium Weres ac eius heredes et successores omnesque fratres et consanguineos eiusdem in pacifico dominio prescripte hereditatis domocos mathe Jacab dicte simulcum omnibus vtilitatibus ad eandem pertinentibus contra quoslibet impeditores causidicos et actores, iuxta antiquam laudabilem consuetudinem sedis Kyzdi dicte, proprys nostris expensis laboribus et fatigys protegere tuere et conseruare. In cuius rei memoriam perpetuamque firmitatem presentes has litteras nostras sigillo nostro pendenti duximus roborandas. Et in hac siquidem arenda et paccione presentibus ibidem Egregys Michaele et Joanne Appor de Althorya dicta, Lazaro Therek de Karathna, Michaele et Johanne cheh de Zenthkatholna, Bartholomeo Bernald de Pesselnek, ac petro scholastico similiter de Althorya, alysque quampluribus fidedignis testibus presencialiter ad hec rogatis et vocatis. Datum in sepefata Althorya, in edibus nostris, Anno domini Millesimo Quingentesimo Tricesimo sexto vigesima quinta die mensis Aprilis.

Egy régi codexből kivágott hártyalapon, melyről a függő pecsét elveszett; eredetije a b. Bálintitt cs. ltárában. Közli: Deák Farkas.